Sosial media idarəçiliyin önəmi barədə “Kaspi” qəzeti məqalə dərc edib. Yazıda Vüqar Babanın fikrlərinin də qeyd olunduğu hissə aşağıda təqdim olunur:
PR üzrə mütəxəssis Vüqar Babanın sözlərinə görə, sosial media idarəçiliyi hədəf auditoriyası ilə daimi münasibətlər qurmaq, bu auditoriyanın fikirlərini öyrənmək, simpatiyasını qazanmaq, ona təsir etmək, bir sözlə – hədəf auditoriyasını idarə etmək istəyən qurumlar üçün vacib vasitədir. Bu, ictimai təşkilatlar üçün sadiq dəstəkçilər, daha az narazı kütlə, kommersiya qurumları üçün isə müştərinin sadiqliyini və yeni müştəri bazası qazanmaq deməkdir: “Şirkətlər və təşkilatlar sosial mediada olub-olmamaq seçimini özləri edirlər. Əgər sosial mediada olmağı seçiblərsə, Sosial Media İdarəçiliyinin yazılmış və yazılmamış qaydalarına əməl etməlidirlər. Əks təqdirdə sosial media kommunikasiyaları bu qurumların əleyhinə işləyə bilər”.
“Müştəri nədənsə narazılığını bildirirsə, bu, şirkətin xeyrinədir”
V.Baba deyur ki, qurumların sosial media mütəxəssisləri olduqları sosial medianın istifadəçiləri ilə kreativ vasitələrlə ünsiyyət qura bilsələr daha çox diqqət çəkərlər: “Hansısa xidmət sahəsi, yaxud məhsul varsa, təbii ki, burada narazı tərəf də olacaq. İş düzgün qurulubsa, bu narazılıqların sayı az ola bilər, amma heç olmaması mümkün deyil. Çünki, hər kəsi eyni səviyyədə razı salmağın özü qeyri-mümkündür. Qurumların sosial media mütəxəssisləri də auditoriyaları ilə sosial media üzərindən kommunikasiya edərkən, bu amili mütləq nəzərə almalıdırlar. İlk növbədə başa düşmək lazımdır ki, müştəri nədənsə narazılığını bildirirsə, bu, şirkətin xeyrinədir. Bir nəfər öz narazılığını yazıbsa, deməli, bu halla bağlı fikirlərini sizə sosial media üzərindən bildirməyən onlarla narazı şəxs var. Bu narazılığı vaxtında öyrənmək üçün iri holdinqlər əslində yüz minlərlə pul xərcləməyə hazırdırlar. Və xərcləyirlər də. Ən ucuzu isə ona bu narazılığı bildirən sosial media istifadəçisidir. Vaxtında problemi görüb, düzəltməsinə kömək edir”.
Mütəxəssis bildirdi ki, neqativ rəylərin səhifədə qalması imic olaraq xoş hal deyil, amma silinməsi və ya yazan şəxsə səhifə idarəçisi tərəfindən neqativ cavabın verilməsi isə daha pisdir: “Çünki həm öz müştərini incitmiş olursan, həm də bu narazı şəxs sizə qarşı daha kütləvi nəsə edə bilər. Çalışmaq lazımdır ki, bu tip şərhlərə də uyğun cavablar verilsin. Bacarıqlı şirkətlər belə narazılıqları böyütmədən, danışıqlar yolu ilə həll edir, hətta öz xeyirlərinə belə çevirə bilirlər”.
Məqalənin tam mətnini BURAYA klikləyərək kaspi.az saytından oxuya bilərsiniz.
Paylaş
